Tres l'anuncia de Los Verdes – Alianza Llibre Europea (EFA) d'una conferencia titulada "Radiodifusión en llingües minoritaries: ónde tamos, ónde tenemos de dir", Iniciativa pol Asturianu (IPA) quier anunciar que'l nuesu representante de Rellaciones Internacionales, Xosé B. Álvarez, va tar presente nel Parllamentu Européu p'asistir a la conferencia y presentar el programa de radio "Iniciativa pol Asturianu nes ondes" como un exemplu esitosu d'un proyectu basáu na radiodifusión nuna llingua minoritaria y en peligru.

El programa de radio "Iniciativa pol Asturianu nes ondes", presentáu pol periodista Samuel Gradín, empecipió la so andadura como un programa de radio mensual d'una hora de duración en xunu de 2012, siendo retresmitíu per 3 emisores de radio (Radio Sele, Radio Ujo y AllerFM). Tres casi añu y mediu d'emisión y dellos personaxes famosos destacaos como l'actriz María Cotiello, l’actor William Miller, el ciclista asturianu y ganador d'una medaya d'oru olímpico Samuel Sánchez o la cantante Cristina del Valle, "Iniciativa pol Asturianu nes ondes" ye agora un programa selmanal de media hora de duración retresmitíu por 12 emisores de radio asturianes y una belga (Radio Alma), lo que lo asitia como un ésitu definitivu nel campu de la radiodifusión n’Asturies y qu'amuesa los bonos resultaos potenciales que pueden algamase inda con recursos tantu económicos como materiales escasos.

"Iniciativa pol Asturianu nes ondes" dixébrase en delles partes, dando una oportunidá pa que los oyentes escuchen entevistes, sepan les caberes noticies sobre la llingua asturiana, deprendan asturianu con una seición d'aprendizaxe y conozan dellos grupos de música asturianos al traviés de los sos cantares.

A lo cabero, dende la so puesta en marcha, esti programa de radio non solo foi grabáu nel estudiu, sinón que tamién tuvo presente en vivu n'eventos como la Universidá Asturiana de Branu (UABRA), el XIII Festival de Gaites "Villa de Xixón", el XVII Festival Intercélticu d'Avilés o la primer edición del Asturies Summer Beer Festival.