“Esta iniciativa cumple yá 5 años y cada añu que pasa va medrando’l númberu de noticies positives”
“Con esta campaña pretendemos facer llegar a los asturianos y les asturianes delles bones noticies pal nuesu idioma”
Inaciu Galán, presidente d’Iniciativa pol Asturianu, presentó esta mañana la campaña ‘Meyor noticia pal asturianu en 2018’ cola que se pretende escoyer, pente medies d’una votación popular, la meyor noticia pa la llingua asturiana nel añu 2018. Galán dixo que “esta iniciativa cumple yá 5 años y cada añu que pasa va medrando’l númberu de noticies positives alrodiu del asturianu y ye la prueba de cómo l’asturianu va ganando espacios y apoyos na sociedá”.
El presidente d’Iniciativa pol Asturianu apuntó que “con esta campaña pretendemos facer llegar a los asturianos y les asturianes delles bones noticies pal nuesu idioma y treslladar que l’asturianu va ganando presencia, normalidá y apoyu na sociedá. Realidaes como que 60 de los 78 conceyos tienen aprobada la toponimia tradicional, qu’un ex presidente d’España apoye per primer vegada la oficialidá del asturianu o que’l Rector de la Universidá d’Uviéu eche una conferencia n’asturianu son una amuesa clara de qu’esta llingua tien futuru”.
Inaciu Galán terminó diciendo que “los y les participantes pueden escoyer ente un total de más de 35 bones noticies pal asturianu de diferente tipu, pudiendo seleccionar hasta 10 al mesmu tiempu”.
La votación va tar abierta nesta páxina web hasta’l domingu 13 de xineru: Meyor noticia pal asturianu 2018
El llunes 14 daráse a conocer la llista de meyores noticies de 2018.
