Los proyectos de radio y televisión Iniciativa pol Asturianu nes ondes y Alderiques d’Asturies van presentase como esperiencies positives nel ámbitu de los medios de comunicación

Los díes 23 y 24 de xunu Iniciativa pol Asturianu va participar nun alcuentru européu dedicáu a compartir actividaes entamaes por entidaes en defensa y promoción de llingües europees amenzaes. Sedrá nuna alcuentru que se fai dientro de los actos de Donostia, capital europea de la cultura 2016 y va axuntar a decenes d’entidaes de toa Europa n’Hernani embaxo’l nome "Hitzargiak-Llingües que s’allumen unes a otres".

Los actos van tener llugar na Orona Ideo (Fundación Orona), y mientres dos díes activaránse rellación, collaboraciones y sinerxes ente los participantes per aciu numberoses presentaciones y actividaes. Inaciu Galán, presidente d’Iniciativa pol Asturianu, sedrá’l responsable de presentar los proyectos calificaos como “bona práctica llingüística” pol comité del alcuentru européu. Sedrá’l vienres 24 a les trés de la tarde, dientro de la mesa redonda  “Medios de comunicación, ayudantes na construcción de sociedaes multillingües”.

Una mesa na que Galán presentará la situación del asturianu y los proyectos nos que ta implicada Iniciativa pol Asturianu: el so programa de radio Iniciativa pol Asturianu nes ondes, dirixíu por Samuel Gradín, y el proyectu Alderiques d’Asturies, que se realiza en collaboración con Gomeru Producciones y ye la primera canal de televisión100% n’asturianu.

L'Alcuentru va ser una posa nel percorríu del proyectu "Hitzargiak – Llingües que s'allumen unes a otres", pa que les comunidaes llingüístiques y falantes que tán somorguiaes nun procesu de revitalización puedan conocese ente sigo y fortalezan los sos llazos, coles mires de consiguir una mayor eficacia nel futuru.

La iniciativa va axuntar más de 70 bones práctiques, d'un total de 12 estaos y 24 llingües. Iniciativa pol Asturianu califica esti alcuentru “como una oportunidá inmeyorable p'aprender d'otres comunidaes llingüístiques, asina como pa compartir lo bono que dende la sociedá civil podamos tar faciendo n’Asturies nesti ámbitu”.