Nes dos primeres selmanes d'agostu celebróse en Cangas del Narcea la Universidá Asturiana de Branu (UABRA), una esperiencia formativa organizada pola Academia de la Llingua Asturiana, la Universidá d’Uviéu y el Conceyu de Cangas. Dientro d’estos cursos, Iniciativa pol Asturianu organizó delles actividaes ente les que destacaron les charres informatives, el concursu de karaoke n'asturianu y el puestu informativu y de venta de llibros a preciu de crisis. El resultáu, nuevos asociaos a la organización y la recaldación de fondos pa la organización a lo llargo de los dolce díes de duración de los cursos.
El concursu de karaoke "Búscase una estrella, ¡canta pol asturianu!" celebróse na nueche del martes 7 d'agostu na Discoteca Zaykor. Una docena de grupos apuntáronse a participar d'esti concursu que cuntó cola presentación de María Díaz ya Inaciu Galán y un "gran xuráu" que supo axuntar humor y xusticia a la hora de calificar a caún de los grupos y solistes participantes. Taba formáu por Xosé Antón González Riaño, director de la UABRA, Pilar Fidalgo, de la secretaria técnica de l'ALLA, y Pablo Rodríguez Medina, escritor y profesor de los cursos.
La ganadora foi Tania Rodríguez Fernández, qu'interpretó una prestosa versión de "Chalaneru", quedando finalistes un grupu de moces con una versión de Bocadillu Rock y Humber, con una versión d'Skama la Rede. El segundu y tercer premiu entrególos Pablo Xuan Manzano, secretariu de la UABRA, y el primer premiu la Presidenta de l'Academia de la Llingua Asturiana, Ana María González Cano, qu'echó un discursu enllenu d'humor nel que felicitó a los artistes poles sos actuaciones al karaoke.
Celebráronse amás, demientres los díes de la UABRA, delles charres informatives onde se dio a conocer a la organización ente los alumnos de los cursos, amás de la instalación d'un puestu informativu con venta de llibros pa recaldar fondos pa la organización.
Nes instalaciones de la UABRA grabóse amás una edición especial del programa de radio Iniciativa pol Asturianu nes ondes, na que Samuel Gradín entrevistó a miembros d'Iniciativa pol Asturianu pa cuntar les actividaes de la organización na UABRA, asina como una entrevista a la presidenta de l'Academia de la Llingua Asturiana, Ana Cano y el direutor de la UABRA Xosé Antón González Riaño.
Semeyes del concursu de Karaoke
Vídeu de l'actuación de la ganadora
Programa especial Iniciativa pol Asturianu nes ondes
