Iniciativa pol Asturianu anunció güei que va acudir a la manifestación pola oficialidá convocada pa esti sábadu 6 d’abril pola Xunta Pola Defensa de la Llingua Asturiana en Xixón
XIXÓN, 03/04/2019. Iniciativa pol Asturianu va participar na convocatoria d’esta manifestación, como yá ocurría l’añu pasáu, con una pancarta qu’embaxo’l títulu “Oficialidá, el camín constitucional de futuru pal asturianu”, van llevar cargos orgánicos, públicos y militantes de tolos partíos presentes na Xunta Xeneral. Iniciativa pol Asturianu convidó a les fuercies polítiques que lleven la oficialidá nel so programa, FSA-PSOE, Podemos, Izquierda Xunida y Foro, a llevar representantes que porten la pancarta, amosando la tresversalidá de la reivindicación de la oficialidá.
Animamos tamién a acompañanos na manifestación y portando la pancarta a militantes d’otres formaciones, como PP y Ciudadanos, qu’entá nun se sumaron a la reivindicación de la oficialidá, pues somos conocedores de que, asina como lo afiten les encuestes, una parte importante de la militancia y los y les votantes d’estes formaciones son partidarios de la oficialidá.
La llingua asturiana nun pue ser elementu de confrontación, tien de ser un elementu d’alcuentru ente los y les demócrates, un elementu qu’amuese que quien cree na llibertá, quier que los y les falantes d’asturianu y gallego-asturianu tengan plena igualdá xurídica xunto a quien s’espresa en castellán.
Iniciativa pol Asturianu va siguir trabayando n’algamar un consensu constitucional en defensa de la oficialidá del asturianu pa garantizar l’usu llibre de la llingua asturiana y del gallego-asturianu en tolos ámbitos, única forma de que podamos tener la oportunidá d’un futuru con vitalidá pal idioma.
